Ku
Iwan M. Ridwan
BAGIAN I
LAMPU
CAANG. HIJI ROHANGAN KAMAR NÉMBONGKEUN KAAYAAN KAMAR MAHASISWA. DINA TÉMBOK POTRÉT
WANOJA NAPLOK NGARENDENG JEUNG KACAPI.
SUSI,
SAURANG MAHASISWI ASUP. PAKÉANANA BASAJAN, PAROMANNA GUMBIRA. NGÉCAGKEUN TAS DINA
DIPAN. TULUY MALIKEUN AWAKNA KA HAREUPEUN PANONGTON. GÉK DIUK.
Kang
Farél, kaka tingkat. Kasép pisan. Kéna-kéna urang kota nya. Panyangka kuring
mah moal daékeun reureujeungan jeung urang kampung. Enya kuring. Pan kuring mah
urang lembur, kampung. Sanajan urang
kampung kuring mah teu bau lisung. Kuring mah urang kampung anu seungit parfum,
urang kampung nu bisa dangdan.
KAWAS
KEUR MIKIR. NARIK NAPAS PANJANG.
Tapi
tong salah, kuring mah masih cinta tur haat kana seni budaya Sunda. Teu poho ka
temah wadi. Ceuk batur mah seni tradisi téh kampungan, idéntikna urang lembur.
Tapi keur kuring mah seni Sunda téh ajenna luhung. Ah nu nyarita seni tradisi
kampungan mah nu teu baroga dadasar élmu wé, buktina Kang Farél mah teu
nyebutkeun kuring kampungan.
Susi
ngaran kuring téh, datang ka kota seja nyuprih élmu pangaweruh ngenaan bagbagan
seni budaya sacara akademis. Enya atuh, kiwari mah apanan kudu nyakola rék jadi
tukang naon, tukang naon ogé, kaasup jadi seniman kudu luhung élmu. Naha ari
kuring rék jadi seniman? Ah duka téh teuing. Rék jadi seniman atawa henteu nu
penting mah dina sagala widang kudu bisa mapakan jaman, sangkan teu kagerus ku
waktu, teu kapergasa ku mangsa.
SUSI
NARIK NAPAS PANJANG. GAP KANA KACAPI ANU NAPLOK DINA TÉMBOK KAMARNA, SATUTAS
DIBAWA DIUK DINA DIPAN ÉTA KACAPI TÉH DITEUNDEUN DINA LAHUNANNA. PRAK
DIJENTRÉNGKEUN. KITUNA TÉH TEU LILA.
Ah
éra ku panongton, pasti aya anu leuwih hébat ngulinkeun kacapi tinimbang kuring.
Ieu gé karék diajar. Ké geus lulus mah tapis. Ah meureun sataun dua taun deui gé
teu burung hébat. Ayeuna mah wajar wé apanan karék asup kuliahna ogé.
Karék
seméster dua. Ari jurusan mah waditra tradisional. Kuring téh resep kacapi,
tapi diajar enya-enya mah teu kungsi. Nya kitu téa di lembur mah taya nu
ngalatih enya-enya, Si Abah mah ukur kitu wé sakasampeurna, bari jeung manéhna
gé da teu jago-jago teuing.
Saur
Abah mah, “Jung Susi nu diajarna ka universitas, sangkan naék darajat, keun waé
abah mah di dieu ngadungakeun.” Abah nyanggem kitu téh duméh kuring getol
diajar kacapi. Abah mah bébélaan ngajual munding sarakit keur mekelan kuring
kuliah ka kota, ikhlas cenah, keun da boga kénéh sawah jeung kebon. Hasilna
bisa dipaké bekel sapopoé. Abah jeung Ambu mah juwara pokona mah.
Resep
geuning di kampus mah diajar nabeuh téh. Éta mah gedung fakultas téh
ngeungkeung wé tatabeuhan, keur karuliah, lain satabeuh-tabeuhna. Studiona ogé
aya opat. Aya studio, gamelan Sunda, gamelan Bali, gamelan Jawa, jeung gamelan Nusantara.
KACAPI
DITEUNDEUN DEUI KANA TEMPAT SAMÉMÉHNA. MANÉHNA NYAMPEURKEUN PANONGTON. MANÉHNA
SEURI KAWAS NU RADA ÉRA.
Kang
Farél. Kaka tingkat anu kasép. Gaya nya ngaranna ogé, jauh bumi ka langitna
jeung ngaran kuring mah. Susi, asli ti lembur, milih jurusan ogé seni tradisi. Béda
jeung manéhna anu milih program studi televisi
dan film. Cocog pisan. Enya manéhna mah siga artis. Kasép. Jangkung. Bodas,
ah pokona mah perfect. Geus saminggu
ari wawuhna mah, ngan tadi diajak maksi
alias makan siang. Mani seseblakan
ieu haté. Diuk paduduaan di résto.
LEOS
DEUI KANA RISBANG, KEDEWEK KANA GUGULING LAJU DITATANGKEUP.
Bet
heurin ku létah tadi mah. Sieun salting,
alias salah tingkah. Sieun témbong
kampungan. Manéhna mah cacarita. Cenah kungsi nyieun film, kungsi jadi artis
dina layar lebar. Geuning panyangka kuring teu nyalahan. Anu siga artis téh
geuning jeung enyana. Baheula, dua taun katukang cenah. Hanjakal kuring mah
tara lalajo ka bioskop baheula téh. Atuh da rék ka mana lalajona sapopoé ukur
uplek di imah jeung Si Abah.
Tapi
keun wé awal ahir gé bisa dipaluruh dina internét, ké lamun jaga geus boga duit
rék meuli smart-phone sangkan bisa
lalajo film manéhna dina youtube.
GOLÉHÉ
MANÉHNA NGEDENG. MELONG KANA GUGULING LAJU DITANGKEUP.
Hayang
teuing reureujeungan tadi téh kabawa ngimpi….
LAMPU
MOÉKAN LALAUNAN. SORA DETIK JAM KADÉNGÉ DINA SOUND.
BACK OUT
BAGIAN II
LAMPU
CAANG. KAAYAAN KAMAR GEUS ROBAH. SEMU KEUMEUH. POTRÉTNA JADI DUAAN, POTRÉT SUSI
JEUNG FARÉL.
SUSI
ASUP. BEUNGEUTNA ALUM. TAS DIBALANGKEUN KANA PANGSARÉAN. GÉK DIUK DINA DIPAN,
TEUTEUPNA SEUKEUT KA HAREUP KAWAS ANU NYIDIK-NYIDIK PANONGTON.
Kang Farél? Éta Kang Farél lain?
MANÉHNA
CENGKAT NYAMPEURKEUN PANONGTON. PANONGTON TAYA NU NGAKU.
Kamana atuh ari Kang Farél, nya?
MANÉHNA
LEUMPANG KA SISI KÉNCA ROHANGAN.
Ari éta Kang Farél lain?
NUNJUK
KA SALAH SAURANG PANONGTON. TULUY NYIDIK-NYIDIK SABAN JALMA. PANONGTON
NGULANG-NGULANGKEUN
Ah lain deui waé.
MANÉHNA
NGAJAUHAN. REG EUREUN NEUTEUP POTRÉT DIRINA JEUNG FARÉL. POTRÉT DICOKOT. DIBAWA
DIUK DINA DIPAN NYANGHAREUP KA PANONGTON.
Kang Farél, ceuk sasaha gé kasép.
NÉMBONGKEUN
FOTO KA PANONGTON. CICING SAKEDAPAN.
Mun
mah manéhna teu tulus
mihukum kuring, tumpur ieu alam dunya. moal rido ieu haté saumur hirupna gé. Moal cageur ku duit sakarung atawa harta banda anu ngalayah. Disebut geus rajét, nya kana kitu meureun ieu haté téh. Kuring mah mending kénéh
nelasan pati tinimbang wirang kulawarga. Ayeuna tacan kabandungan ku sasaha
sotéh, isuk jaganing géto mah naon anu geus kajadian di antara kuring jeung manéhna téh bakal bruk-brak narémbongan.
MANÉHNA
NEUTEUP KA HAREUP KAWAS ANU HAYANG BEBEJA KA PANONGTON.
Sataun
reureujeungan téh, inget kénéh basa manéhna kedal cinta. “Akang
cinta pisan ka Susi, sumpah daék medu,” pokna téh. Sedil
ayeuna mah kana éta kekecapan téh. Horéng ukur pupulasan. Cinta, cenah. Geuning
cinta anu disebutkeun ku manéhna mah galak kacida. Bisa mengpar tina tetekon
anu geus diguratkeun dina kahirupan jalma loba. Cinta téh égois! Hayang meunang
sorangan. Kitu geuning cinta anu disebutkeun ku manéhna mah.
Nyurahan cinta téh saceplakna pisan. Ceuk manéhna mah cinta téh rasa anu ngancik dina haté lalaki ka awéwé atawa sabalikna. Mun mah maranéhna bisa nepungkeun cinta, kabagjaan bakal datang ka maranéhna. Beu, ngan ukur tepi ka dinya nu disebut cinta ku Kang Farél mah.
Kawasna Kang Farél geus teu cinta ka kuring ayeuna mah, sabab meureun geus béak sagala rupa anu mucunghul tina kecap cinta téh. Geus jucung tepi kana mumunggangna nu disebut cinta ku manéhna mah. Meureun. Ku harianeun geuning manéhna mah.
MANÉHNA
NARIK NAPAS PANJANG. TULUY NEUTEUP ANTEB KANA ÉTA POTRÉT.
Beubeutkeun
waé kitu ieu potrét téh? Ngarah poho. Atawa gunting sina misah, tuluy duruk.
Sangkan taya tapakna. Atawa ngarah manéhna panaseun pédah potrétna diduruk?
Ah
moal aya pangaruhna, mana sina ieu potrét téh haté manéhna. Apanan ieu mah ukur
gambar. Sakadar kertas. Potrét mah teu salah. Potrét mah sakieu kasépna. Imut sakieu
amisna. Ihlas. Mani bangun anu enya
nyaah ka kuring.
POTRÉT
DIUSAP. KECLAK CIPANONNA NGECLAK KANA POTRÉT.
Ah
nu salah mah nasib diri meureun. Bet ku daék narima Kang Farél sataun ka
tukang. Satadina mah kuring boga anggapan rék bagja hirup jeung manéhna. Satadina
bagja boga batur hirup di kota, cacakan kuring mah cukleuk leuweung cukleuk
lamping hirup di kota téh. Teu dulur teu baraya.
Nu
salah mah kuring meureun teu daék ngadéngé kana omongan Kang Raga anu kungsi
nyaritakeun Kang Farél mah playboy.
Cenah Kang Farél mah lalaki anu hirupna dipaké ngamurah-maréh awéwé. Teu
sirikna boga kabogoh téh sabulan sakali. Jeung itu jeung ieu majar téh.
Nampa
béja sarupa kitu kuring teu ieuh percaya. Kuring gé apal Kang Raga téh neundeun
haté kadua leutik ka kuring, éta mah akal-akalan manéhna hungkul sangkan kuring
ngajauh ti Kang Farél. Tuluy daék ka manéhna.
GÉK
MANÉHNA DIUK DINA KORSI HAREUPEUN EUNTEUNG.
Eumh.
Mun mah baheula kuring percaya kana omongan Kang Raga, meureun moal ngarandapan
nasib sarupa kieu.
GAP
LEUNGEUNA KANA KACAPI ANU NAMPEU HAREUPEUNNA. SAWATARA LILA MANÉHNA NABEUH
KACAPI BARI JEUNG TEU PUGUH LAGUNA, DILELEBAH KU SORANGAN, SAKUMAHA GENAHNA CEUK
SORANGAN, SIGA-SIGA LAGU KINGKIN.
Kuring
teu surti basa manéhna curhat. Ngeunaan kahayangna boga bébéné urang lembur. Harita
manéhna nyebutkeun kuring béda ti wanoja séjén, kuring mah déwasa, kuring geulis
sanajan basajan. Dedeg pangadeg kuring mirip Dinda Kirana artis sinétron, tipeu
manéhna pisan majar téh. Panon, biwir, irung nyeples pisan Dinda Kirana, Anu
bédana téh kuring mah boga karang handapeun panon kenca. Matak manis ceuk manéhna
mah. Cenah.
MANÉHNA
NGEUNTEUNG NEGES-NEGES BEUNGEUTNA.
Atoh
harita mah dipujii kitu téh, horéng keur ngarayu. Aya ku rikip maling haté awéwé
téh. Padahal harita mah kuring jarang diwedak-wedak acan, jajauheun siga-siga
artis sinétron.
Bener-bener
poékeun harita mah, daék dibobodo, turug-turug kuring keur ngarasa kesel ku
Kang Raga anu satengah maksa kudu narima cintana. Atuh gampang pisan kadoja. Eumh
bet kapanggih sanggeus urang reureujeungan mah, horéng Kang Farél téh...
NARIK
NAPAS PANJANG.
Teu
wasa nyaritakeunana gé...
JUNG
NANGTUNG. MURU TEMPAT SARÉ. KACAPINA DIKEUKEUWEUK. DIPETIK LALAUNAN DINA DIPAN.
LAMPU MOEKAN LALAUNAN.
FADE OUT
BAGIAN III
FADE IN
ROHANGAN
KEUMEUH. SUSI CINDEKUL DINA RISBANG. TUNGKUL KANA HENPUN DINA LEUNGEUNNA.
DASTER ANU DIPAKÉNA KUCEL.
Béja
pamustungan téh ukur nyebutkeun sibuk. Ukur sakecap dina WhatsApp. Teu bébéém teu telepon, kiwari taya nu bisa dikontak.
Sibuk.
Baheula kuring gé sok rajeun dibawa ka tempat gawéna upama sibuk téh. Kuring biasa
nyérangkeun ti ka anggangan. Resep mun geus nénjo manéhna shooting film. Mani
sagala bisa manéhna mah, jadi actor, jadi sutradara, boh film boh téatér.
Kungsi
jadi Romeo dina drama Romeo and Juliet, kasép kacida, gagah. Dunya
film jeung téater keur Kang Farel mah kacida
pentingna, sapenting dirina dina éta karya. Dunya film jeung téater geus jadi tokoh
utama dina kahirupan Kang Farél. Penting pisan keur dirina mah, teu kawas kuring
anu ukur piguran dina kahirupan manéhna. Duka teuing kétang, rarasaan mah teu
jadi piguran-piguran acan. Jadi level
paranti ngadegkeun setting panggung meureun,
atawa batten paranti ngagantungkeun
lampu. Enya meureun ukur jadi anu kitu, Teu, kuring mah, teu katémbong ayana.
Hina
meureun diri téh mun tepi ka disurahan kawas kitu. Malah leuwih ti kitu. Kuring
mah ukur tali sasampayan nu salalawasna kapoé kahujanan, sedeng baju anu dipoéna
teu weléh ditatap diusap bari jeung diseungitan pakéeun manéhna. Ah boa mémang
kuring mah teu dianggap aya.
JRUT
MANÉHNA TURUN TINA RISBANG. KATÉMBONG BEUTEUNGNA RADA BUREUYEUNG.
Lunta
téh teuing ku lampar Kang Farél mah. Jauh teu kasusul. Ti panggung ka panggung.
Ti film ka film, tuluy ngajomantara, ngaliwatan kaméra, wakil sapasang panon
manusa. Sanajan manéhna aya di satukangeunana, tapi leuwih sibuk batan baheula,
meureun. Manéhna gé mondok moék kawas baheula, meureun. Mun mah baheula remen
mondok jeung kuring kiwari mondok teuing jeung saha?
Teu
sono ka kuring, kitu? Teu hayang panggih? Kuring mah nineung. Nganti manéhna nu
rék mihukum upama geus boga pangasilan sorangan. Sabadana kuring lulus wishuda.
Moal bisa ngadagoan wishuda kawasna sabab ieu buah cinta kuring jeung manéhna
téh bakal miheulaan kaluar méméh kuring maké toga.
MANÉHNA
NGUSAPAN BEUTEUNGNA.
Ieu
téh buah cinta, meureun. Ceuk manéhna harita, cinta mah henteu ngan sawates
kekecapan, cinta mah kudu aya buktina, nya ieu meureun buktina sanajan matak
wirang. Bingung teu manggih tungtung. Lewang taya hinggana.
Kumaha
nya pilampaheun? Kamana geusan maluruh bapa ieu budak? Awéwé mah heureut deuleu
pondok lengkah téh enya. Kungsi nyusul ka tempat gawéna majar keur di luar. Di
luar téh di mana, geuning taya raratan. Naha teu boga waktu kongan pikeun mulang.
Kuring mah teu kamamana. Nganti di dieu, di kontrakan anu kiwari can kabayar
tilu bulan. Mun mah teu sanggup mayar saminggu deui, nya kuring kudu lunta ti
ieu tempat. Lunta kamana?
GEK
MANÉHNA DIUK DEUI HAREUPEUN EUNTEUNG. NYANGHAREUPAN KACAPI.
Manéhna
mah meureun keur sibuk itu ieu wé. Sagala ditataharkeun. Meureun moal jauh béda
jeung anu biasa katénjo baheula. Kuring mah di dieu ngalelengkur napakuran
diri. Mapay-mapay deui tapak mangsa duaan meupeuskeun rasa kasono, ngangon
kacinta nu teu diwatesan. Jandéla, rérégan, risbang, potrét, kacapi, ayeuna mah
kabéh caricing bangun hayang ngabandungan kamana nya ngamalirna cimata kuring.
Kontrakan
anu mimindengna ramé basa aya manéhna ayeuna kacida simpéna, boa kamar gé sono hayang
deui nyaksian talajak manéhna nalika datang ka dieu.
Bet
jadi keueung. Kuring teu wasa ari kudu mulang ka lembur mah. Rék dikamanakeun
ieu beuteung. Rék diteundeun di mana ieu beungeut. Tada teuing nyerina batin
Ambu jeung Abah nyaksian nasib kuring kawas ayeuna.
SIMPÉ SAKEDAPAN. LEUNGEUNNA NGODOK KACAPI LAJU NGALUARKEUN BALATI.
Ieu
titinggal hiji-hijina ti manéhna. Hand porperti
pintonan Romeo-Juliet baheula. Meunang ngahaja meuli duaan.
BALATI
DITEUTEUP.
“Kang, lamun Akang teu tulus mihukum kuring, moal
rék rido ieu haté sumur hirupna gé. Disebutkeun haté geus rajét, nya meureun
kana kitu. Kuring mah mending kénéh teu ngalaman kumelendang di alam dunya
tinimbang kudu narima wirang saumur hirup. Wilujeng kantun kang. Meureun jaga
di alam baka urang bakal panggih deui. Boa kuring anu nyieun balitungan ka
akang mun teu sabalikna ogé.”
“Ambu,
Abah, hampura Susi.”
BALATI
DIBULAK-BALIK.
“Yeuh
balati, kuring masrahkeun ieu diri!”
BLACK OUT
Bandung,
23 Maret 2016