SAJAK DINA GALURA 2 DESEMBER 2014

 Galura, Minggu ka-2 Desember 2014

Sajak Panineungan II

Aya urat tunggara dina soca salira

Urat nu ngelemeng mangsa urang paadu teuteup

Teuteup meumeut. Teuteup nu geus laas tina lambaran kahiruan urang

Ketug jajantung. Geter wirahma sora kalan-kalan mapayan pitapak rasa

Geuning, mangsa nu di tukang leuwih éndah batan paneuteup kahareup nu dianggap sieup

Geuning lalakon wirahma nu dipalar bakal satia kalah sulaya

Ibun jeung girimis lantip ngadingdingan diri

Lalangsé ahéng lir ngagurat garis lukisan astana anyar

Ngagambar lawang-lawang kaéndahan

Nyipta jalan pileumpangan anu brasna ka panineungan mangsa asih urang burakrakan

Bandung, Mei 2012

 

Peuting Teuing Kujemping

Ukur simpé jeung sakolanding kasono nu nampeu hareupeun

Mawa sasab lampah lamunan nu beuki lampar

Laun-laun nganjang ka saban tempat nu kungsi kasaba

Unggal kecap reujeung paripolahna nyambuang kana lelembutan

Kumarayap dina satiap réngahap

Kumareumbing dina diri nu teu weléh nyaring

Simpé teu puguh déngé

Haté teu wéléh ngadalingding asih pangaping

Mirig lalakon katresna basa mangpuluh rasa kasono anjog kana haté urang

Imut salira mawur payuneun bangku taman, kembang kertas jeung sapasang kukupu pulas gandola

Teu kendat méré rasa kana haté nu beuki kumeleter

Peuting téh teuing ku jempling

Hawar-hawar nu kapireng ukur laguning dangding

Dipirig lalakon awaking nyeueung peteng sakuriling bungking

Mangsana kaasih urang ngamalir ka sagarana masing-masing

Bandung, Juli 2011

 

Jalan Agama jeung Darigama

Kaasih ngamalir, kacinta ngamuara

Ngaleuya dina saban mangsa jeung huma katresna

Nyieun gurat aksara urang dina batu gunung, dina langit batin

Haté anu kungsi katambias ayeuna geus laas

Langit anu kungsi alum ngungun geus jadi catetan buhun

Hamo dipitineung komo disorang deui

Kiwari, jalan ngeumbat geus sasambat

Jalan panjang caang bulan sasapuan

Kembang-kembang nu can katincak geus ngarampidak

Tatapakan jeung hambalan ngagentraan

Geusan marengan lalampahan urang

Lalampahan dina jalan agama jeung darigama

(2014)

FESTIVAL GEOPARK CILETUH

(diterjemahkeun ku Iwan M. Ridwan tina feature Mandalawangi BandungTV )

Lelewek Geo­­park Ciletuh anu pernahna di kacamatan Ciemas, mangrupa hiji lelewek anu euyeub ku bangsning batu purba pangkolotna di Pulo Jawa. Dumasar kana sawatara panalungtikan anu dilakonan ku para ilmuwan Géologi, éta bangsaning batu  purba téh katangen diwengku ti mimiti zat asam tepi ka ultrabasa, sedimen tepi ka metamorfik, tur ngarandapan pagésék tepi ka mucunghulkeun mozaik alam anu matak betah panénjo. Niténan alam Ciletuh katara pisan waasna, batu-batu anu ngampar, gédéngeunana pasawahan tur sagara Hindia di jauhna  nyiptakeun kaéndahan anu lain bantrak-bantrakeun.

Lalampahan ka éta lelewek Ciletuh sababaraha waktu ka tukang, dilakonan pikeun medar bibit-buit tempat wisata anu poténsial, sangkan dihangkeutkeun jadi salah sahiji pangjugjugan wisata di wewengkon Sukabumi Selatan. Éta kagiatan dipilampah duméh di éta wewengkon téh boga poténsi anu gedé dina widang pariwisata.

Éta kagiatan téh mangrupa salah sahiji tarékah pamaréntah pikeun ngaronjatkeun ajén Géopark Ciletuh, anu mangrupa salah sahiji pangjugjugan wisata di Jawa Barat. Sajoroning kitu, ngaliwatan éta kagiatan, dipiharep Géopark Ciletuh anu gedé poténsina téh dipiharep jadi pangjugjugan wisata anu leuwih punjul sa-Jawa Barat tur bisa dipiwanoh ku masarakat. Dinas Pariwisata dan Kebudayaan Jawa Barat ngébréhkeun, éta kagiatan téh luyu kana jejer anu dipaké nyaéta Exploring Ciletuh. Ari anu dimaksud ku éta jejer taya lian kagiatan anu dilakukeun mangrupa lalampahan ngaliwatan wahana féstival pikeun miwanoh poténsi kawasan Ciletuh, boh poténsi budaya boh poténsi alam.

Dina éta féstival téh diwewegan ku mangrupa-rupa kagiatan, kawas hélaran budaya pajampangan, rampak lodong, panggung hiburan rahayat, atraksi paralayang, panjat tebing, kamonésan nyukcruk basisir sarta ditutup ku aksi sadar wisata katut prakprakan melak tangkal kepuh.

Lelelwek Géopark Ciletuh mangrupa salah sahiji teluk purba. Kurang leuwih genep puluh juta taun kalarung, éta lelewek téh mangrupa laut anu jero, balukar tina lémpéng Eurasia anu ngandung zat asam nindih lémpéng Indo-Australia anu ngandung zat basa. Lémpéng Australia anu saban waktu ngésér ngabalukarkeun lémpéng Eurasia anu mangrupa palung laut pangjerona ngampul, tur tepika ayeuna éta lémpéng téh ngajanggélék jadi rancah (lembah) raksasa Ciletuh Sukabumi Selatan. Bangsaning batu anu mucunghul nyingraykeun lalangsé dadasarna batuan atawa sédimén anu mangrupa bangsaning batu kerak sagara katut bagian mantel dunya atawa ofiolit. Éta bangsaning batu téh ngabaur kana sédimén laut jero katut lamping jero palung laut anu nelah mélange. Bangsaning batu beurat blok Ciletuh di lebah kulon-kidul urug ka jero teluk Palabuan Ratu, ari sésana témbong mudigdig  lebah kidul-wetan. Ku kituna, topografi teluk Ciletuh mah lir talapok (tapal) kuda raksasa anu nyanghareup ka laut kidul. Dumasar kana morfologi-na, éta Géopark Ciletuh ngajanggélék jadi hiji lelewek anu ngabogaan wates tanah darat anu luhur kalawan hambalan anu déngdékna kacida tepika ampir vertical.

Pakaya Géopark Ciletuh kacida pisan tohagana, alamna anu upluk aplak téh diwewegan ku bangsaning batu purba, ku kituna di éta lelewek réa pisan curug.

Kagiatan anu dikokolakeun ku dinas Pariwisata jeung Kabudayaan téh mangrupa tarékah sangkan masarakat di éta lelewek bisa ngahangkeutkeun poténsi anu aya, sangkan jaga leuwih kakoncara. Upama geus kitu, meureun bakal loba anu daratang ka éta tempat, utamana anu boga karesep kana alam anu patali jeung batu purba. Upama geus ramé nya warga kénéh anu bisa mopolahkeuna jadi lahan digawé enggoning ningkatkeun pangupa jiwa. Tapi anu leuwih hadé dipigawé sagancangna, utamana ku pihak dinas pariwisata jeung kabudayaan, éta lelewek téh dibebenah heula infrastrukturna utamana mah jalan.