NASKAH LONGSER RELIGI
IWAN M. RIDWAN
BAGIAN
1
PANGGUNG KOSONG. POÉK. SORA DEGUNG
DITABEUH SABABARAHA LILA. LAMPU MIMITI CAANG NYIEUN SILUÉT HIJI TANGTUNGAN
JALMA NGALIWAT BARI NGAJINGJING KOTAK AMAL. BEUNGEUT JEUNG RUPANA TEU JELAS
SIDIK LAMPU MASIH KÉNÉH POÉK.
SORA DEGUNG BEUKI NGEUNGKÉUNG. BRAY
LAMPU CAANG. BRÉH KATEMBONG SETTING PANGGUNG KAWAS HAREUPEUN MASJID. AYA TERAS
JEUNG BEDUG. BABAN ASUP KANA PANGGUNG BARI MAWA SAPU. TULUY SASAPU.
BABAN : Panongton. Ningali Si Jaja teu?
PANONGTON : (ngajawab)
BABAN : Euh,
nya kamana ari Si Jaja? Yeuh panongton, Kuring
jeung Si Jaja téh JamesBon, alias tukang Jaga Masjid jeung Kebon. Ari Masjidna
mah masjid ieu. Ngan kebonna, kebon batur. Kebon Pa Haji, teu pira ukur kebon
sampeu, ngan sampeuna baradag, aya anu sagedé pingping sagala, loba deuih ari
dijagaan ku duaan. Kieu tah barang gawé jeung Si Jaja mah. Pamalesan manéhna
mah. Tuh tingali ieu buruan masjid mani barala, kudu kuring waé anu sasapu téh.
Heuh. Dasar Si Jaja. Tapi keun baé lah mudah-mudahan wé jadi amal hadé keur
jaga di ahérat nya, penongton. Sugan wé ku ayana beberesih di masjid téh jadi
cukang lantaran kuring ka surga. Amiiiin.
PANONGTON KEPROK. KURUNYUNG JAJA BARI
HARUHAH-HARÉHOH. DATANGNA TI JERO
MASJID.
BABAN : Éta
geuning anu kasép téh. Tos ti mana kasép, mani kawas anu diudag jurig kiciwis?
JAJA : Ampun, Kang. Ampun.
BABAN : Naha
da kuring mah lain jurig. Ampun kunaon?
JAJA : Lain Kang, aduh éta…..
BABAN : Naon
atuh éta téh?
JAJA : Éta kotak amal Masjid.
BABAN : Ku
naon? Duitna pinuh? Keun atuh urang nyieun deui ka Mang Karna.
JAJA : Lain.
BABAN : Kunaon
atuh?
JAJA : Leungit, Kang. Aya anu maling.
BABAN : Ah
sok ngarang teuing. Di mana aya anu maling kotak amal. Tuh lamun arék maling
mah mobil, motor, atawa hayam pelung. Barina ogé apanan kotak amalna masih kénéh kosong kamari anyar kénéh dibuka.
JAJA : Aya duitan Kang, hasil Jumatan kamari. Sing Sumpah demi Alloh Kang,
leungit!
BABAN : Hus!
Pamali sumpah demi Alloh, Sumpah demi Alloh. Ulah disapirakeun ari sumpah téh
komo demi Alloh sagala rupa.
JAJA : Ari nggeus demi naon atuh supaya akang percaya?
BABAN : Moal
percaya. Paling ogé poho neundeun manéh mah.
Téangan deui sing bener. Paling ogé di jero rohangan DKM.
JAJA : Geus dikotéktak ka ditu ka dieu Kang, teu aya. Hoaaaa (CEURIK)
BABAN : Kawas
budak.
JAJA : Atuhda Akang teu percaya waé. Éta téh duit ummat, Kang. Duit infnak keur biaya perawatan masjid.
Urang kudu tanggung jawab, Kang.
BABAN : Enyaan
leungit?
JAJA : Apanan ceuk kuring ogé tadi téh leungit. Leungit! (NGAGOROWOK)
BABAN : Hayu
atuh urang téangan.
JAJA : Geus capé kuring mah. Jung wé Akang.
BABAN : Euh.
Moal ditéangan atuh ah
JAJA : Hayu atuh! (RADA JEJEBRIS)
MUSIK DITABEUH DEUI. BABAN JEUNG JAJA
TÉMBONG PULANG ANTING KADITU KADIEU. TEU KUNGS LILA REUG AREUREUN DI TENGAH
PANGGUNG. BREK DARIUK DINA TÉRAS MASJID.
JAJA : Nya ceuk kuring ogé leungit.
BABAN : Enya.
Kudu néangan ka mana atuh nya?
DUANANA
NGALAMUN SAKEUDEUNG.
JAJA : Kuring aya ideu kang.
BANDU : Ideu
kumaha?
JAJA : Urang tanyakeun ka Mbah Rewog!
BABAN : Mbah
Rewog Dukun?
JAJA : Enya. Manéhna mah apanan dukun lepus sagala nyaho. Batur ogé anu
laleungit duit sok ka manéhna. Biasana duitna kapanggih atawa balik deui.
Jagoan pokona Mbah Rewog mah, kotak amal masjid mah bakal gampang kapanggihna.
BABAN : Mani
yakin kitu bisa gampang kapanggih, naon alesanana?
JAJA : Kotak amal mah gedé, Kang, gampang maluruhna. Béda jeung duit, ari
duit mah leutik.
BABAN : Lah
percaya teuing ka dukun, musrik, nyaho?
JAJA : Ieu mah ikhtiar, Kang. Maenya ikhtiar disebut musrik.
BABAN : Mémang
ikhtiar mah wajib. Tapi urang ulah percaya dukun bisa kana sagala rupa kaasup bisa
malikeun deui barang anu geus leungit. Urang mah kudu percaya ka Alloh anu
nangtoskeun sagala rupa dina kahirupan urang.
JAJA : Leungit kotak ku Alloh?
BABAN : Ku
maling ari leungit kotak amal mah.
JAJA : Naha ari tadi akang nyarita sagala ku Alloh.
BABAN : Sagala
ditangtukeun ku Alloh, kaasup kajadian leungit kotak ayeuna. Tapi lain hartina
Alloh anu mindahkeun éta kotak amal.
JAJA : Lieur ah ngomong jeung Kang Baban mah. Terus ayeuna urang ikhtiar
kumaha deui atuh? Ditéangan di jero euweuh. Di luar teu kapanggih kénéh.
BABAN : Ke
heula kuring keur mikir.
JAJA : Ulah loba mikir dina waktu kieu mah. Geus ayeuna mah kuring rék bébéja
wé ka Pa Haji.
BABAN : Ulah!
JAJA : Naha?
BABAN : Manéh
hayang dicarékan?
JAJA : Naha dicarékan?
BABAN : Yeuh
lamun kotak amal leungit terus urang bébéja ka Pa Haji saruwa wé jeung
ngalaporkeun kagoréngan urang deuleu!
JAJA : Naha kagoréngan urang da lain urang anu maling?
BABAN : Apanan
urang anu jaga. Lamun kotak amal leungit nandakeun urang teu bener gawé di
dieu. Maenya kotak amal ogé tepika leungit, naha naon gawé atuh. Ngadon saré
hungkul.
JAJA : Bener ogé ka lebah dinyana mah Kang. Lapor ka Pa Érté atuh. Sugan
bangsatna bisa kapanggih.
BABAN : Ulah.
Kumaha lamun Pa Érté bébéja ka Pa Haji?
JAJA : Enya ogé Kang. Ah… Kapikiran. Hansip urang téang, Kang!
BABAN : Naha
néang hansip?
JAJA : Éh ari akang, apanan hansip salaku kaamanan di ieu kampung. Sugan wé
manéhna manggihan jalma anu ngagiwing kotak amal. Tah urang gé bisa nyalahkeun manéhna
lamun di kampung urang masih aya kénéh maling padahal geus aya petugas keamanan
alias siskamling.
BABAN : Ulah
ari nyalahkeun mah. Teu tuah teu dosa bet disalahkeun.
JAJA : Kumaha ngké wé masalah eta mah. Ayeuna mah kuring mah rék néang hansip
sugan apaleun.
KARÉK OGÉ NANGTUNG JAJA, HANSIP GEUS NGURUNYUNG
MANTEN TI SISI PANGGUNG. DUAAN HARITA
HANSIP ANU DATANG TÉH. DULAH JEUNG DULÉH.
HANSIP
1 & 2 : Sampurasun! Asalamualaikum!
JAJA : Rampes!
BABAN : Waalaikum
salam. Tah geuning kabeneran Mang Dulah jeung Mang Duléh aya kadieu.
DULAH : Nyaéta
bieu téh teu ngahaja ngaliwat, nguping téh badé néang hansip. Saha anu badé
nikahkeun, Ncép?
DULÉH : Nguah
nyiru deui yeuh Ki Dulah.
JAJA : Na ieu téh anu dipikirkeun téh nguah nyiru wé. Barina ogé saha anu
rék ngawinkeun?
DULAH : Éta
saur tadi kakpuing badé ngulem hansip. Nya badé naon atuh pami sanés badé ditugaskeun
jaten Kopasjat mah, Komando Pasukan Hajat.
JAJA : Éta geura. Yeuh hansip. Ari anu ngarana hansip téh tugasna lain
ngajaga dina hajat kawinan hungkul, tapi ngajaga kaamanan nagara urang.
DULÉH : Ah
apanan nagara urang mah ayeuna geus merdéka, aman sentosa, teu kudu dijaga.
JAJA : Ééh! Aman kumaha, ieu buktina deuleu kotak amal masjid leungit.
Maenya aya anu disebut aman aya kénéh kaleungitan?
DULAH : Kutan
ical? Sabaraha diicalna, Ncép? Aéh saha anu malingna, Ncép?
JAJA : Heueuh éta matakna rék nanyakeun ka aranjeun duaan.
DULÉH : Ah
teuing kuring mah teu rumasa maok kotak amal masjid. Lamun maok sampeu ti kebon
Pa Haji pernah basa keur ngaronda.
DULAH : Ulah
dibéja-béja.
JAJA : Tah geuning ieu meureun bangsatna. Lain aya ku ngajaga kaamanan di
dieu ngadon jaradi bangsat. Hayoh siah kadieukeun kotak amal.
DULÉH : Sing
demi tah daék kékéd méngkéné teu maok kotak amal.
DULAH : Muhun
Ncép, abdi duaan mah henteu rumaos nyandak kotak amal.
JAJA : Ah siah ngaku.
BABAN : Kéké.
Naha ieu téh jadi silih tuding.
DULÉH : Si
Jaja tah anu nuduh kuring maok (NUNJUK MAKÉ CURUK).
DULAH : Muhun
Cép Jaja (NUNJUK MAKÉ JEMPOL)
JAJA : Cenah tadi maok sampeu Pa Haji, berarti kotak amal ogé dipaok.
DULÉH : Da
éta mah lapar keur ngaronda. Jaba geus dipénta halalna ka Pa Haji ogé.
BABAN : Heup!
Heup! Heup! Maksud néang hansip ka dieu téh lain rék ngajak paséa di dieu. Tapi
aya perlu. Aya tanyakeuneun anu penting.
DULÉH : Tah
sok atuh, béjakeun saha anu rék hajat téh.
JAJA : Pok deui, pok deui kana hajat.
BABAN : Heup!
Jempé, Jaja. Lain perkara hajat ieu mah Mang Dulah, Mang Duléh. Tapi perkara kaleungitan
kotak masjid.
DULÉH : Naha
rék nuduh deui ka kuring duaan?
BABAN : Ké
heula kuring can anggeus nyarita. Lain rék nuduh, tapi saheunteuna ari hansip téh
apanan anu biasa jaga di poskamling, sugan ieu mah sugan, salah saurang di
antara Mamang duaan…..
DULÉH : Teu.
Teu rumasa maling….
BABAN : Lain
rumasa maling atawa henteu.
DULÉH : Naon
atuh?
BABAN : Rumasa
pernah ningali aya jalma ngaliwat bari mamawa kotak amal henteu?
DULAH : Tah
éta mah abdi kantos ningali, Ncép.
BABAN : Tah
geuning mimiti aya kelemengna. Saha tah jelemana, Mang?
DULAH : (NUNJUK
JAJA ANGGER MAKÉ JEMPOL) Tuh! Cép Jaja.
JAJA : (BURINGAS) Kuring? Pitenah gedé yeuh! Sidik kuring mah anu ngurus
jeung ngajaga.
BABAN : Tah
geuning. Ari Jaja rumasa mindahkeun kotak, henteu?
JAJA : Teu. Kuring mah teu maok. Sing daék meduna ogé. Teu dikamamanakeun
ku kuring mah.
BABAN : Ké,
ké. Iraha ieu téh Mang Dulah nempo Si Jaja mawa kotak amal?
DULAH : (MIKIR
KAWAS ANU NGINGET-NGINGET) Saémut Mamang mah kinten kana dua minggon ka pengkér,
Cép.
BABAN : Tah
éta mah geuning geus lila. Di mana tah ningalina, Mang?
DULAH : Pami
teu lepat mah di parapatan jalan payuneun warung Jang Iwan.
BABAN : Tah
geuning aya laratan.
JAJA : Kang Baban nyangka kuring anu ngaleungitkeun kotak?
BABAN : Ké
lanan Ja, can anggeus yeuh patalékan kuring ka Mang Dulah.
DULAH : Muhun
manga, Cép.
BABAN : Harita
basa Si Jaja mawa kotak téh ti lebah mana datangna, Mang?
DULAH : Katingalna
ku Mamang mah ti lebah tanjakan Parahulu, Cép!
DULÉH : Tah
geuning bukti ayeuna mah. Ngadon nuduh ka batur.
JAJA : Kasebelan nyangka téh. Yeuh hansip, kuring harita téh anyar mawa éta
kotak amal ti imah Mang Karna.
BABAN : Oh
enya, enya inget ayeuna mah.
DULÉH : Tuh
geuning bangsatna Mang Karna.
BABAN : Lain
éta mah, Mang Duléh, Mang Karna mah anu nyieunna kotak amalna. Nya harita
dibawa ku Si Jaja ti imah manéhna.
JAJA : Sangeunahna cacapék téh, ngadon nuduh kanu boga tanggungjawab.
BABAN : Heup
Jaja, ulah jadi ambek.
JAJA : Atuhda sebel.
BABAN : Heup.
Lamun kitu mah bener éta kotak amal téh leungit. Ayeuna mah kieu we!
JAJA : Kumaha?
BABAN : Ikhtiar
urang-urang masih kurang. Tuluy ikhtiar urang gé kudu dibarengan ku du’a.
JAJA : Maksudna?
BABAN : Ayeuna
urang mencar néangan kotak amal, urang papayan ieu lembur sugan malingna acan
jauh.
DULÉH : Tah
hadé kitu!
DULAH : Ngiringan
Mamang ogé, Ncép.
JAJA : Ari ngadoana?
BABAN : Éta
mah gampang. Bisa ngadoa bari ikhtiar. Lamun teu bisa maca doana, keun kuring
sorangan anu ngadoa. Ayeuna mah kieu wé. Hayu urang mencar. Manéh ka ditu Ja
(NUNJUK KA SISI PANGGUNG KÉNCA), Mang Dulah ka ditu (NUNJUK KA PANGGUNG BELAH
KATUHU), Mang Duléh ka ditu (NUNJUK KA HAREUPEUN PANGGUNG), Kuring ka ditu
(NUNJUK KA TUKANG PANGGUNG).
HANSIP : Siap.
JAJA : SIap, Kang.
BABAN : Bral
atuh geura mariang. Kuring ieu rék nyimpen heula sapu jeung hayang k acai heula.
JAJA : Enya, Kang!
HANSIP : Siap!
KABEH NGALÉOS LUYU JEUNG PANUDUHAN BABAN. ARI BABAN
NGADON NGOLÉSÉD KA PIPIR MASJID. TULUY KALUAR DEUI BARI MAWA SAMPING SARUNG
JEUNG KOPÉAH.
BABAN : Panongton!
PANONGTON : Euy!
BABAN : Kudu
apal yén ikhtiar téh kudu dibarengan ku du’a! Tah ayeuna kuring arék ngadu’a.
Keun anu ikhtiar mah Si Kasép Jaja jeung Si Mang Dulah katut Mang Duléh. Insya
Alloh ngké ogé aya hasilna. Satuju?
PANONGTON
RIEUH
BABAN : Ieu
mah lain syu’udhon maranéhna teu barisaeun ngadu’a, tapi kudu sing adil. Lamun
maranéhna ikhtiar bari ngadu’a, meureun ripuh kacida. Ari kieu mah apanan
dibagi-bagi tugas. Maranéhna anu néangan, kuring anu ngadu’a. Satuju henteu?
(PANONGTON RIWEUH DEUI) Heup, heup. Geus ayeuna mah, kuring rék ngadu’a heula.
Ulah garandéng, nya!
PANONGTON
NYURAKAN. SUP BABAN KA JERO MASJID. LAMPU PANGGUNG PAREUM.
BLACK OUT
BAGIAN 2:
BRAY LAMPU PANGGUNG CAANG.
SETTING GEUS NEMBONGKÉUN KAAYAAN JALAN. AYA TANGKAL, HANDAPEUN TANGKAL AYA
WARUNG LEUTIK, AYA BANGKU
PANJANG/BALE-BALE. CEU MIDAH TEMBONG MEMERES WARUNGNA. JOL DADUNG NYAMPEURKEUN.
DADUNG : Kopi
hideung sagelas, Ceu Midah. Mani asa ku tunduh kieu ieu téh.
CEU
MIDAH : Alah
tunduh mah lain ku kopi atuh Jang Dadung.
DADUNG : Ku
naon atuh Ceu?
CEU
MIDAH : Hees
kaituh!
DADUNG : Hees
waé mah moal beubeunangan atuh Ceu.
CEU
MIDAH : Heueuh
atuh nya geus naon peuting teu saré?
DADUNG : Nyaéta
Ceu, apanan ngaronda. Cilaka di kampung urang ayeuna.
CEU
MIDAH : Cilaka
ku naon? Rek aya bahaya?
DADUNG : Lain
rek aya bahaya, Ceu, apanan cenah loba kacaritakeun loba anu leungit duit.
CEU
MIDAH : Ku
bangsat kitu?
DADUNG : Tah
éta anu jadi soalna téh. Anu maokna tara kanyahoan.
CEU
MIDAH : Nya
saha cenah anu geus kaleungitan duit téh?
DADUNG : Si
Haer cenah duit pamajikanana unggal peuting téh leungit sapuluh rebu perak.
Atuh éta deui majar Nyi Awih ogé kitu, leungit unggal peuting téh dua puluh
rebu éta mah majarkeun téh.
CEU
MIDAH : Har
naha bisa kitu nya. Boa-boa éta mah ku……..(MIKIR)….. Iyh jadi muringkak bulu
punduk Euceu mah.
DADUNG : Enya
nyaéta, Ceu. Ah mana kopi téh Ceu, bet asa lila.
CEU
MIDAH : Alah
enya poho, ke sakeudeung atuh urang naheur caina heula.
DADUNG : Tobat,
Gusti, acan aya caina, Ceu?
CEU
MIDAH : Nu
matak ari geus kolot mah sok limpeuran. Saré heula we kainya!
DADUNG : Ah
teu niat dagang téh si Euceu mah ah.
CEU
MIDAH : Ngaranna
ge dagang di panggung atuh Jang.
DADUNG : Nyao
ah. Saré heula we.
DADUNG
NGAGOLER DINA BALE-BALE. NYI AWIH JEUNG CEU EET DATANG.
CEU
EET : Euleuh-euleuh. Ieu Jang Dadung tengah poe ereng-erengan kieu ngadon
ngabaheuhay.
NYI
AWIH : Enya ieu téh kunaon Kang Dadung téh. Ibak kaituh kang.
DADUNG : (NGOREJAT)
Astagfirullohal adzim. Keur ngalenyap bieu téh. Padahal sakeudeung deui nyorang
alam pangimpian rek panggih jeung para widadari.
NYI
AWIH : Wah éta mah sanés bade ka alam pangimpian atuh kang.
DADUNG : Ka
mana atuh?
NYI
AWIH : Ka ahérat, Kang.
DADUNG : Naudzubillahi
min dzalik. Ulah ngadu’akeun kitu Nyai, pamali.
CEU
EET JEUNG CEU MIDAH TINGCALENGIR NEMPO DADUNG KAWAS ANU KASIEUNAN.
CEU
MIDAH : Bongan
saha atuh bet hayang panggih jeung widadari sagala.
DADUNG : Enya
ari widadarina mah hayang atuh Ceu, ngan ari kudu maot ayeuna mah ulah waka
kahayang mah. Can boga bekelna.
CEU
MIDAH : Enya
atuh ari kitu mah pek sing soson-soson ibadahna. Aeh enya ieu cikopi téh geus
aya, bisi kapohoan deui. Atawa rek saré heula?
DADUNG : Ah
Si Euceu mah. Cik kadieu atuh.
CEU
MIDAH : Yeuh
atuh meungpeung panas.
DADUNG
NAMPANAN CIKOPI.
CEU
EET : Abdi mah meser tarasi, Ceu. Éta Bapana budak cenah hayang nyambel
tarasi. Jeung lalabna lamun aya mah.
CEU
MIDAH : Aya
tah daun bolostrong jeung jotang mah. Pek we atuh korehan, aya naon baé di
dinya!
CEU EET : Nyai
Awih bade meser naon?
NYI
AWIH : Abdi mah bade meser anu aya we.
DADUNG : Abdi
ge aya atuh Nyi. Bade meser abdi?
NYI
AWIH : Ey si Akang mah, kanggo naon atuh abdi meser akang?
DADUNG : Ah
nya kanggo naon we atuh nyi.
CEU
MIDAH : Keur
nyingsieunan beurit meureun Nyi. Hehe.
DADUNG : Ah
Ceu Midah mah ari nanon téh
CEU
MIDAH : Hehe.
Heureuy atuh Ujang. Lain aya béjana cenah Nyi Awih sok leungit waé duit. Naha
enya éta téh?
DADUNG : Tah
enya bener aya jinisna, Ceu. Hempek tanyakeun bisi kuring disangka gede wadul.
CEU
MIDAH : Kumaha
cenah éta téh caritana, Nyi?
NYI
AWIH : Ah nyaéta atuh Ceu, abdi mah asa ku mindeng pisan leungit duit
DADUNG : Kurang
sidekah meureun éta téh Nyi! Cik kadieu atuh sidekahna.
NYI
AWIH : Ah nyarios we atuh, kang, palay dipasihan.
CEU
MIDAH : Jang
Dadung mah bisa we mamatahan. Tong didenge Nyai ah, anggur si tuluykeun kumaha
jujutanana bisa leungit waé duit?
NYI
AWIH : Ah da teu aya juntrunganana, Ceu, nu pasti mah leungit we unggal
peuting salambar.
DADUNG : Tah
cekeng ge, Ceu, kitu kajadianana téh. Moal jauh ti…..
NYI
AWIH : Budak dugul kitu, Kang? Iy bararaid teuing, bet asa maruringkak
bulu punduk.
DADUNG : Kuring
mah lain bulu punduk hungkul anu muringkakna ogé Nyi, tapi bulu-bulu dina
sakujur awak.
NYI
AWIH : Ey amit-amit.
CEU
MIDAH : Euh
pantesan ti tadi murungkut bari jeung heuay waé atuh.
DADUNG : Ah
naon hubunganana, Ceu?
CEU
MIDAH : Ah
pikiran we Ujang da geus gede.
NYI
AWIH : Ah abdi mah teu ngararartos éta téh naon ah. Hayu ah Ceu Eet, abdi
mah atos balanjana ge.
CEU
EET : Heman atuh Nyai, da Euceu ge atos.
CEU
EET JEUNG NYI AWIH NGALEOS BARI MAWA BALANJAAN.
CEU
MIDAH : Eh
eh, Nyai, artosna!
NYI
AWIH – CEU EET: Kasbon, Ceu.
CEU
MIDAH : Kasebelan,
kasbon deui, kasbon deui. Nu mangkukna ogé acan dibalayar. Omat Jang Dadung mah
kudu kontan nya, ulah kasbon.
DADUNG : Moal
atuh Ceu, kuring mah cungcreng biasana ge.
CEU
MIDAH : Nya
geus beubeunangan ngojegna?
DADUNG : Ah
acan. Tapi ari mayar kopi-kopi waé mah gampang Ceu.
CEU
MIDAH : Sukur
atuh ari kitu mah.
HAER
JEUNG OHA DATANG.
DADUNG : Tah
geuning aya anu rek mangmayarkeun kopi. Di dieu ngaropi heula.
HAER JEUNG OHA SILIH PELONG. GEK HAER DIUK.
OHA MASIH KÉNÉH NANGTUNG HAREUPEUN WARUNG.
DADUNG : Ngopi
heula atuh Cep Oha, Den Haer!
HAER : Ncap-Ncép,
Ndan-Nden. Baku silaing mah ari geus aya kahayang mah. Teu boga duit uingna ge.
OHA : Antep lah, geuleuh lamun geus cunihin téh.
DADUNG : Duh
hawatos teuing teu gaduh artos nya! Atuh moal tiasa neraktir sim kuring.
HAER
TEU API-API TEU NGADENGE OMONGAN DADUNG
OHA : Sia anu karunya mah! (NYAMPEURKEUN CEU MIDAH) Aya anu amis tiis,
Ceu? Mani asa hanaang kieu.
CEU
MIDAH : Hempek
éta téang aya naon atuh di dinya.
OHA
KURAH KOREH KANA DAGANGAN.
CEU
MIDAH : Tos
ti marana atuh sarujang duaan téh?
OHA : Abdi mah tos nganteur Si Haer, Ceu.
CEU
MIDAH : Nya
tos ti marana?
OHA : Apanan tos ti Si Mbah.
DADUNG : Mbah
Rewog?
HAER : Hayang
nyaho waé silaing mah.
CEU
MIDAH : Aeh
naha tos naraon ti Mbah Rewog. Bangun-bangun aya anu penting.
OHA : Nyaéta apanan Ceu, Si Haer mah leungit waé duit.
DADUNG : Nya
ceuk kuring ge, Ceu. Kuring mah lain saomong-omongna lain sabéja-béjana.
CEU
MIDAH : Heueuh
mani apalan jang Dadung mah.
DADUNG : Kumaha
cenah ceuk Mbah Rewog téh?
HAER : Ah
hayang nyaho waé.
CEU
MIDAH : Kumaha
cenah, jang. Kapanggih anu malingna?
OHA : Ah dasar Si Haer we atuh panasaran. Ari saur Mbah Rewog mah duitna téh
da teu leungit. Aya di imahna KÉNÉH cenah.
CEU
MIDAH : Aya,
euweuh di imah?
OHA : Duka da acan ditéang deui.
HAER : Nyaéta
Ceu, keur diinget-inget ku abdi ge. Ari ceuk Mbah mah cenah aya di kolong
ranjang.
CEU
MIDAH : Tah
geuning aya raratanana.
HAER : Enya
puguh bet panasaran. Tapi jongjon ogé Ceu kana kituna mah.
CEU
MIDAH : Sukur
atuh!
DADUNG : Tah
bisa ayeuna mah mangmayarkeun cikopi kuring, Den!
HAER : Huntu!
JAJA
DATANG BANGUN ANU LANGLAYEUSEUN. NU AYA MARELONG SEUKEUT.
JAJA : Hayang sirop, Ceu. Mani haus kieu.
DADUNG : Ti
mana euy, mani siga anu capé kitu?
OHA : Siga anu geus ngudag bangsat kitu mani laat-leet kesang.
JAJA : Geuning Kang Oha terang.
HAER : Aya
bangsat naon wayah kieu?
CEU
MIDAH : Baruk
aya bangsat?
DADUNG : Tah
tah tah. Bangsat naon Ja, euy? Hayam? Entog? Meri? Piit?
JAJA : Lain.
HAER : Begal
motor? Atawa jambret?
JAJA : Sanés!
OHA : Ari kitu bangsat naon atuh?
JAJA : Kotak Amal Masjid leungit.
CEU
MIDAH : Masya
Alloh tabarokalloh. Naha teu sieun-sieuneun dosa gede kitu bangsat téh. Cik
atuh maling mah ulah barang masjid.
DADUNG : Ka
warung atuh ngabangsat mah nya, Ceu.
CEU
MIDAH : Is
ulah! Kumaha cenah Cep bangsat téh. Kapendak henteu?
JAJA : Manawi, Ceu. Teu aya raratan.
CEU
MIDAH : Éta
atuh cobaan taros ka Mbah Rewog, ujang. Tuh geuning artos Jang Haer ogé
kapendak cenah.
DADUNG : Tah
bener pisan, Ja.
JAJA : Ah sieun musrik.
DADUNG : Eh
lain musrik-musrik, apanan ikhtiar ngaranna ogé. Tuh buktina Si Haer ge duit
anu leungit tea bisa kapanggih deui.
JAJA : Leres kitu, Kang Haer?
HAER : Acan
ari kapanggih mah. Ngan pedah aya tuduhna hungkul.
DADUNG : Tuh
berarti bener, geus aya tuduhna mah. Sahenteuna kotak amal ogé bisa kapaluruh
lamun aya tuduhna di mana di mendina.
CEU
MIDAH : Geuning
pinter jang Dadung téh.
DADUNG : Dadung
tea atuh. Arék moal Ja? Hayu dianteur ku sayah. Keun demi kahadéan mah moal
itungan sayah mah. Hayu. Ieu mah demi duit ummat.
JAJA : Hayu atuh dianteur mah.
DADUNG JEUNG JAJA GEUWAT INDIT. HAER
JEUNG OHA BATI OLOHOK. ARI CEU MIDAH GOGOROWOKAN.
CEU
MIDAH: Jang Dadung kopi teu acan dibayar!
DADUNG : (VO)
Éta ku Cep Oha, Ceuh!
OHA : Teu sudi teuing ah Ceu, sina ngahutang we.
CEU
MIDAH : Kumaha
atuh diaranjukan waé. (NGALENGIS)
PANGGUNG
POÉK. MUSIK DITABEUH.
BAGIAN
3
LAMPU CAANG. SETTING GEUS ROBAH JADI
HIJI ROHANGAN MBAH REWOG. TEMBONG MBAH JAMBRONG KEUR NYANGHAREUPAN PARUKUYAN.
AYA MENYAN, KENDI, KEMBANG TUJUH RUPA, CAU, JSJB.
TEMBONG BIWIRNA KUNYAM-KUNYEM BARI
MURULUKEUN MENYAN KANA PARUKUYAN.
MBAH : Ulung-ulung
Sangkuriang kabeurangan. Datles…. Datles…. Datles. Cai tiis saliranti paniisan
Siliwangi. Hurip…. Hurip….. Tiis…. Tiis…
DADUNG
JEUNG JAJA TEMBONG DI SISI PANGGUNG. LAMPU NYOROT KA MARANEHNA.
MBAH : Saha
arandika duaan anu di luar. Pek geura arasup saumpama boga pangabutuh ka kaula.
DADUNG : (MEH
BARENG JEUNG JAJA) Sampurasun, Mbah.
MBAH : Rampes!
Hiyap ka dieu!
DADUNG
JEUNG JAJA ARASUP. GUK-GEK DARIUK HAREUPEUN MBAH REWOG.
DADUNG : Nyanggakeun
salam pangabaktos, Mbah, sim kuring duaan seja tumolojog ka payuneun salira teu
aya sanés iwal ti seueur kaperyogian.
MBAH : Heug!
Salam pangabakti anjeun ditarima ku kaula.
DADUNG : Hatur
nuhun, Mbah!
MBAH : Geura
pok kainya naon anu jadi paneja arandika téh?
DADUNG : Anu
gaduh karerepetna mah ieu Pun Jaja, Mbah. (NYIKU JAJA ANU BELAH-BELOH)
MBAH : Hempek
caritakeun, Ujang! Naon anu jadi unek-unek téh?
JAJA : Abdi téh leungit kotak amal masjid, mbah!
MBAH : Baruk?
Ku saha dipalingna cenah?
DADUNG : Nu
mawi Mbah ditaroskeun ka Mbah ge teu aya anu terang saurna mah.
MBAH : He,
He, He! Sanggup nyumponan pasaratanana?
DADUNG
JEUNG JAJA RUNGAH-RINGEUH.
JAJA : Naon atuh saratna, Mbah.
DADUNG : Sumuhun
Mbah, mamanawian tiasa kahontal kanggo ngayakeunana.
MBAH : Ha!
Ha! Ha!. Alus ari kitu mah. Heug ku dewek ditataan hiji-hiji. Lamun perlu
dicatet, catet!
DADUNG : Mangga,
Mbah. Kaleresan abdi ieu sayogi pulpen mah, namung kertasna teu gaduh.
MBAH : (NGALUARKEUN
KERTAS TINA HANDAPEUN TEMPAT DIUKNA) Pek tah mere kertasna.
DADUNG : Hatur
nuhun, Mbah.
MBAH : Pek
ayeuna geura catet.
DADUNG : Tulis,
Ja!
JAJA : (UNGGEUK BARI GASIK NYOKOT PULPEN JEUNG KERTAS) Naon waé Mbah?
MBAH : Heug.
Kahiji, menyan putih sagendul. Kadua, Pendil dieusian ku cai tina tujuh curug,
lamun euweuh pendil bisa diganti ku kendi. Katilu, kembang tujuh rupa. Opat
kalapa hejo. Lima bakakak hayam jago anu can kungsi ngalaki. Tujuh endog hayam kampung
tilu siki. Dalapan kertas anu aya gambar Pa Karto jeung Pa Hatta sapuluh
lambar. Salapan Bako cap nona….
JAJA : Euleuh geuning mani seueur.
MBAH : Loba
KÉNÉH! Éta mah pasaratan keur anu gaib.
Aya deui pasaratan keur anu dohir.
DADUNG : Euleuh
kutan aya bentenna, Mbah?
MBAH : Nu
matak ajian-ajian kaula mah mujarab.
DADUNG : Yaktos,
yaktos.
MBAH : Pasaratan
anu kadua mah nyaéta keur anu dohir, kahiji, iket barangbang semplak jeung kampretna katut pangsi. Kadua,
hayam hirup sajodo, anu jawerna paranjang. Katilu, tali beuheung pulas koneng
herang.
JAJA : (NGAHAREWOS) Dung, moal kabedag keur ngayakeun pasaratanana ogé.
MBAH : Kumaha
sanggup?
JAJA : Kumaha atuh, Dung.
DADUNG : Har
apanan Jaja anu boga bubutuhna ogé.
MBAH : Kumaha
sanggup arandika duaan ngayakeunana? Montong sok silih tuduh!
DADUNG : Sa….
Sanggem, Mbah!
MBAH : (SEURI
NYAKAKAK)
JAJA : Dung? (MALIK KA MBAH REWOG) Abdi mah henteu, Mbah. Mangga, permios.
(JUNG NANGTUNG, TEU ANTAPARAH DEUI BEREPET LUMPAT NINGGALKEUN ÉTA TEMPAT)
MBAH : (KAGET.
TAPI TULUY SEURI) Andika sorangan anu sanggup ngayakeun sagala pasaratanana!
DADUNG : (KAWEUR.
GUGUP. BEREBET LUMPAT) Ampun, Mbah teu sanggem.
MBAH : (AMBEK)
Bangkawarah pejuh jaman kiwarin. Montong sok los-los ka dieu teu garableg kaera
mah.
MBAH
REWOG JAJAMPEAN DEUI. TULUY MURULUKEUN MENYAN KANA PARUKUYAN.
LAMPU
BLACK OUT:
BAGIAN
4
LAMPU CAANG. SETTING PANGGUNG NEMBONGKÉUN
HAREUPEUN MASJID DINA BAGIAN KA HIJI. BABAN MASIH KÉNÉH MENEKUNG DI JERO SOK
SANAJAN SUSAH PIKEUN NEMBONGKÉUNANA. TEU LILA TI HARITA JAJA JEUNG DADUNG
DATANG HARIWEUSWEUS.
DADUNG : Cilaka
mun seug tadi teu geuwat lumpat. Manéh anu teu eucreug mah ah, ngadon
ninggalkeun.
JAJA : Nyao ah. (LUAK-LIEUK KAJERO) Kang Baban! Wah ieu yeuh aya ku teu
adil. Batur kuar kieur ka ditu kadieu nenéangan bangsat ieu ngadon ngahenen di
jero Masjid.
BABAN : (KALUAR
TI JERO) Keke, datang-datang ngadon parasea, ngadon kukulutus ka kuring deuih.
Aya naon ieu téh? Mana kotak amalna kapanggih?
JAJA : Aya naon, aya naon. Mana kotak, mana kotak. Kang Baban tah taya
gadag pisan. Euweuh pisan ikhtiar, lain aya kadua mantuan indit néangan. Euweuh gawéna pisan batur riweuh ikhtiar téh.
BABAN : Kelanan
nyarios téh, kasép! Naha da kuring ogé mantuan.
JAJA : Mantuan ti mana horeng, ti tatadi ngalelengkur di jero masjid. Nilik
kana kieu mah, geus rek samet dieu kuring mah mantuan Kang Baban di Masjid téh.
BABAN : Aeh
aeh, naha tepi luluasanan kitu éta téh.
JAJA : Atuhda kesel, kuring mah asa diperlakukeun teu adil.
BABAN : Teu
adil lebah mana, Jaja?
JAJA : Teu adil lebah mana, Jaja? (NGALELEWE)
BABAN : Yeuh
dangukeun, ulah sok belikan. Naha pedah kuring cicing di Masjid disangka teu gawé?
JAJA : Moal aya anu usaha cicing. Usaha nanahaon éta?
BABAN : Apanan
dibagi tugas. Jaja jeung hansip anu miang. Éta geuning Jaja dibaturan ku Jang
Dadung.
JAJA : Ari Kang Baban?
BABAN : Akang
di dieu anu menekung ngadu’a ka Gusti Nu Maha Suci, supaya usaha jeung ikhtiar
Jaja sabatur-batur hasil tur digampilkeun.
JAJA : Wah ngadu’a mah gampang. Nyaho kitu mah kuring we ti tadi téh anu
ngadu’a. Yeuh kuring ogé bisa ngadu’a mah, sok hayang du’a anu kumaha? (PEPÉTA
KAWAS ANU REK MUJASMEDI).
DADUNG : Naha
geuning ngadu’a téh siga anu arék pencak silat?
DAUNG
JEUNG BABAN NAHAN PISEURIEUN.
JAJA : Manéh mah tara ngadu’a meureun, Dung. Ieu téh tatacara supaya urang
husu dina ngadu’ana. (PEPÉTA DEUI KAWAS TADI)
DADUNG : Maenya
aya ngadu’a siga arék gelut.
JAJA : Eh sugan hayang dihabek! (MOLOTOT KA DADUNG)
BABAN : Heup!
Heup!
DADUNG : Ampun,
Ja, ampun!
BABAN : Ulah
sok ngaheureuykeun du’a, Jaja. Barina ogé du’a mah teu kudu pepéta, tapi
urangna anu husu mah, hatena ulah kamana mendi.
JAJA : Bongan Kang Baban pikasebeleun, batur gawé nenéangan barang anu
leungit ieu kalah menekung cicing di jero masjid.
BABAN : Nya
lamun hal éta ceuk Jaja salah, hampura atuh. Sing gede-gede ngahampura da ari
jalma mah tempatna poho jeung salah.
JAJA : Tapi poho jeung salah téh lain hartina urang ngahajakeun.
BABAN : Nya
lain hartina kitu. Hampura atuh!
DULA JEUNG DULÉH DATANG BARI KAWAS ANU
GALUMBIRA. MAKE JEUNG TETEMBANGAN SAGALA. TEMBANGNA MAH BEBAS KUMAHA ANU
MERANKEUN. DINA LEUNGEUNNA RANGGEM KU BABAWAAN: BOGÉM, BESEK, KERESEK.
JAJA : Heup! Heup! Mani asa ngadenge kaleng ditajongan euy nyanyi téh. Ku
naon silaing duaan téh, kasurupan heh?
DULAH
JEUNG DULÉH SILIH PELONG.
DULÉH : Euh!
Teu apaleun keur bungah nya, Kang!
DULAH : Enya!
Yeuh kuring duaan mah rek bagi-bagi rezeki, bagi-bagi kabungahan.
DADUNG : Walah
bener euy ieu mah mawa berekat mani loba. (NYAMPEURKEUN DULAH JEUNG DULÉH)
JAJA : Nanaonan ieu téh? Ngadon bagi-bagi rezeki, bagi-bagi kabungahan.
Mana kotak amal, mana? Kapanggih bangsatna?
DULÉH : Kotak
amal?
JAJA : Kotak amal masjid. Apanan silaing duaan téh dititah néangan kotak
amal masjid, naha balikna ngadon
babawaan anu kieu patut. Kotak amalna mana?
DULÉH : Alah
poho!
DULAH : Euleuh
néangan kotak amal nya?
JAJA : Masya Alloh tabarokalloh naha teu inget tugas silaing duaan téh
mantuan kuring néangan kotak amal?
DULAH : Emut,
emut!
JAJA : Terus ayeuna?
DULAH : Muhun
abdi téh nuju bade milairan maling kotak amal tea saréng ieu Si Duléh, di
parapatan jalan aya janur melengkung.
JAJA : Tuluy?
DULAH : Nya
dituturkeun we éta janur téh. Ari pek téh geuning aya anu hajat di dinya téh.
BABAN : Wah
barabe atuh Mang milarian bangsat kanu hajat mah.
DULAH : Ah
da ciosna mah henteu milarian bangsat, Cep!
JAJA ; Nanaonan atuh?
DULAH : Tunggu
anu hajat we! Tah ieu buruhna. (NGASONGKÉUN BABAWAAN)
BABAN
JEUNG DADUNG NAHAN PISEURIEUN DEUI.
JAJA : Tobat, Gusti. Manusa téh mani euweuh anu sahulueun.
DULAH : Punten
atuh, Cep, da kumaha parantos naluriah salaku hansip upami aya kariaan téh asa
gaduh tugas.
JAJA : Heueuh ari kana kariaan asa boga tugas, ari kanu kamalingan
dipopohokeun.
DULAH : Punten
Cep teu aya maksad ka dinya. (NGARERET KA DULÉH) Manéh tah anu mirucaan!
DULÉH : Mangga
atuh pami bade dibuka mah berekatna. Simpen di dieu waé nya! (BRU NYIMPEN
BABAWAAN DINA TERAS MASJID LAJU DIBUKAAN HIJI-HIJI)
DADUNG : (NYAMPEURKEUN)
Cik Mang Duléh, abdi mah hoyong ieu ah, ali agremna mani kareueut kieu!
BABAN : (NYAMPEURKEUN)
Aya peuyeum kétan hideung, Mang?
DULAH : Mangga
atuh ngaleueut, Cep! (NAWARAN JAJA)
JAJA
NGADON NGAGANGGALOK, LIEUR KU KAAYAAN. SEDENGKÉUN ANU LAIN BALAKECRAKAN. KEUR
KITU JOL PA HAJI NYAMPEURKEUN KALUARNA TÉH TI PIPIR MASJID.
PA
HAJI : Assalamualaikum!
SARÉREA ; Waalaikum
salam,
BABAN : Eh
Pa Haji, ngaleueut Pa Haji.
PA
HAJI : Alhamdulillah keur murak berkat. Aya rezeki ti mana? Naha geuning
Si Jaja mah teu miluan curak-curak malah kawas anu keur sedih?
DULÉH : Alhamdulillah,
Pa Haji, berkat tinu gaduh hajat di lebak.
PA
HAJI : Syukur atuh aya rezeki sarérea. Ari Jaja ku naon teu milu ngariung?
Teu diajakan?
JAJA : Sanés, Pa Haji.
PA
HAJI : Har ari kitu?
JAJA : Hapunten, Pa Hji, hapunten!
NYIEUM
LEUNGEUN PA HAJI SABABARAHA KALI. SARÉREA NGEUREUNKEUN CAPÉK RAHEMNA, MELONG KA
JAJA.
PA
HAJI : Ke ieu téh asa jadi teu kaharti. Hampura kunaon atuh, rarasaan mah
Jaja teu boga dosa ka Pa Haji?
JAJA : Muhun hapunten, Pa Haji, hapunten!
PA
HAJI : Enya dihampura, tapi dihampura tina dosa naon heula Jaja téh kudu
sing puguh!
JAJA
MELONG KA BABAN. NU DI PELONG TUNGKUL. JAJA MALAH CEURIK NGAGANGGALOK.
PA
HAJI : Aeh aeh, naha ngadon
ngaganggalok.
BABAN : (NANGTUNG
NYAMPEURKEUN PA HAJI) Abdi anu lepatna mah Pa Haji!
PA
HAJI ; (OLOHOK) Har itu geura, aya naon ieu téh!
BABAN : Hapunten,
Pa Haji.
DULA
JEUNG DULÉH NYALAMPEURKEUN, SARUWA DEKU HAREUPEUN PA HAJI BARI CUMALIMBA MENTA
DIHAMPURA. PAMUNGKAS ANU MENTA DIHAMPURA TÉH DADUNG, SARUWA DEUIH DEKU.
PA
HAJI MAKIN KAGET.
PA
HAJI : La ilaha illalloh, naha baroga dosa naon ieu barudak téh atuh.
JAJA : Hapunten, Pa Haji abdi anu lepatna mah.
BABAN : Abdi
kétang Pa Haji anu lepat.
DULAH : Abdi
anu lepat, Cep Baban saréng Jaja mah teu lepat.
DULÉH : Abdi
anu lepat, Kang Dulah mah henteu.
DADUNG : Abdi
mah gaduh dosa Pa Haji…
SARÉREA
KAWAS ANU PAREBUT NGAKU DOSA.
PA
HAJI : Heup heula. Cik saurang atuh anu nyaritana, mani asa lieur.
BABAN : Jaja
waé anu nyarita.
JAJA : Kang Baban we atuh.
PA
HAJI : Kalah silih tunjuk. Cik Jaja anu ngomong atuh!
JAJA : Tapi Pa Haji kedah ageung-ageung ngahapunten.
PA
HAJI : Gumantung kana dosa jeung henteuna.
JAJA : Tuh nya, alim atuh ah, Kang Baban waé anu nyarios.
PA
HAJI : Naha make jeung embung, yeuh ari dosa mah lain manusa anu
ngahampura, tapi Alloh azza wa jalla. Hempek ulah sieun, Pa Haji mah moal
burung ngahampura.
JAJA : Ah Kang Baban waé anu nyariosna.
PA
HAJI : Eh ari nanaon téh sok kumeok memeh dipacok. Sok atuh Baban anu
nyarita.
BABAN : Euh,,,
(NGAHULENG) Perkawis ieu Pa Haji, (MIKIR DEUI) Kotak amal….
PA
HAJI : Ruksak koncina….?
BABAN : Sanés,
Pa Haji.
JAJA : Leungit, Pa Haji….hoaaaa…. (CEURIK NGAGANGGALOK KAWAS BUDAK)
PA
HAJI : Lailaha illalloh éta Si Jaja ngadon kanyenyerian kawas budak.
JAJA : Hapunten abdi teu tiasa ngajagana Pa Haji, kotak téh aya anu
maling.
BABAN : Hapunten
abdi ogé Pa Haji teu tiasa ngajagi.
DULAH : Hapunten
abdi Pa Haji, abdi ogé teu eucreug milarian bangsatna,
DULÉH : Muhun
Pa Haji, hapunten
DADUNG : Hapunten
abdi mah malah ngajak milarian téh ka pananyaan Mbah Rewog Pa Haji.
PA
HAJI : Masya Alloh mani rariweuh pedah kotak amal euweuh dina tempatna?
Naha lain bébéja atuh ka Pa haji.
JAJA : Inggis Pa Haji bendu. Apanan artos ummat kotak amal mah.
BABAN : Muhun
Pa Haji.
PA
HAJI : (GOGODEG) Mun mah maraneh téh bébéja ka Pa Haji, meureun moal
riweuh kawas kieu. Yeuh kotak amal mah henteu leungit.
KABEH
NGARENJAG. JAJA TEU PERCAYA.
JAJA : Ical Pa Haji, teu aya di tempatna, kawasna mah aya bangsata.
PA
HAJI : Henteu, Jaja, jung téang ka tempatna.
BABAN : Leres
éta téh Pa Haji? (BERENGBENG MANÉHNA LUMPAT KA TUKANG TEU KUNGSI LILA BALIK
DEUI BARI MAWA KOTAK AMAL). Enyaan aya deui.
PA
HAJI : Da memang henteu leungit.
JAJA : (OLOHOK) Naha kamana atuh ari tadi?
PA
HAJI : Apanan koncina ruksak, ku Pa Haji kotak téh dibawa ka imah
dibenerkeun heula. Tuh ayeuna mah geus alus deui apanan. Tah Pa Haji kadieu téh
nganteurkeun deui kotak rek sakalian mikeun koncina (NGODOK SAKU NGALUARKEUN
KONCI) Bongan maraneh datang-datang Pa Haji ngadon dicareungceurikan.
DULÉH : Ah
Jaja mah ngaririweuh batur.
DULAH : Enya
ah Jaja mah ngalieurkeun.
DADUNG : Euh
sugan téh bener aya bangsat maling kotak amal.
JAJA : Hampura atuh da kuring ge teu apal.
PA
HAJI : Nu matak lamun aya nanaon téh dikomunikasikeun supaya puguh
juntrunganana. Geus ayeuna mah ulah careurik angguran tuluykeun barang daharna.
DULÉH ; Ah
kakaren tinu hajat mah rek bawa ku kuring kabehna ogé, moal dibere Si Jaja mah.
(RIKAT NGAJEWANG BABAWAAN ANU BACACAR DINA TERAS MASJID)
SARÉREA : Euh
dasar jelema rewog.
TAMAT