Galura, Edisi 1 Januari 2016
Ku
Iwan M. Ridwan
“Pa, Wildan mah hoyong ka alun-alun malem taun baru téh, hoyong ningali kembang api, ”
omong Wildan bari rap dibajuan ku indungna sasatna karék bérés mandi.
“Enya,
engké dicandak ka alun-alun ku Apa, sok
ayeuna mah anggo heula acukna, tiris,” indungna bari ngabajuan téh ngabébénjokeun.
“Saur
saha di alun-alun aya kembang api?” kuring nalék.
“Saur
Adit. Adit mah badé ka alun-alun, Pa. Wildan
gé hoyong,”
“Jauh
alun-alun téh, Wildan, apanan urang mah
teu gaduh motor komo deui mobil,” kuring minangkana mah nyarék ku cara anu rada lemes.
“Nyéwa wé atuh,
Kang, motor mah piragé lima puluh rébu,”
ceuk pamajikan kawas anu ngahayuan kana kahayang anak.
“Moal
meunang sakitu malem taun baru mah, meureun dua tikel lipetna naékna ogé,” kuring keukeuh nolak.
“Ih
kawas nu teu nyaah ka anak téh, tara
unggal poé ieuh atuh, taun kali gé biheung,” pamajikan semu jebi.
“Sareng
Ema wé yu, keun Apa mah ulah diajakan,” Wildan
ngomongna mani daria. Matak ngajenghok keur kuring mah éta kekecapan téh. Horéng budak téh
boga kahayang anu enya-enya.
“Ku
naon Wildan téh mani hoyong pisan ka
alun-alun?” ayeuna mah bari cingogo nalék téh,
taktakna dicepeng ku dua leungeun kuring.
“Saur
Adit di alun-alun mah seueur kembang api, arageung, Adit mah unggal taun baru
ogé ka alun-alun. Wildan gé
hoyong terang. Wildan mah teu kantos ka alun-alun,” pokna ayeuna mah aya
anu ngembeng dina héhérang panonna.
Gabrug
awakna ku kuring ditangkeup, sina nyuuh kana taktak. Ngahelas haté mah nyaksian nu jadi anak boga kahayang bari
jeung teu sapira lamun rék
dibabandingkeun jeung kahayang jalma séjén mah. Nyaéta
atuh kaayaan ukur batan sakieu.
“Keun
atuh, ngké Apa badé milarian heula artos kanggo nyéwa
motor sareng ongkosna, nya. Du’akeun Apa sing hasil,” kuring ngabeberah. Padahal
mah duka teuing rék ti mana meunang
duitna.
“Asyik!
Wildan badé ka alun-alun, badé
taun-baruan!” Budak
téh mani ajrag-ajragan. Kawas anu meunang
kabungah.
“Hayu
Ma, urang ameng ka Si Adit,” pokna bari nungtun ramo indungna, tuluy ka luar.
Sakedapan
mah kuring ngarahuh. Panon ngawaskeun ka nu ngingkig ka lebah wétan, anak anu nungtun indungna. Rét ka pangkéng.
Kojéngkang suku hideng ngaléngkah. Reug eureun hareupeun bupét wadah baju. Pantona dibuka. Leungeun
ngaragamang kana handapeun baju. Aya nu karampa handapeun baju pamajikan téh, lokét
leutik semu kucel. Diteuteup sakedapan. Selétingna
dibuka. Eusina diakuarkeun bari diteuteup. Salambar pelastik anu dirapet ku
perekat warna beureum ngageleng. Plastik téh
dibuka, jerona aya kertas jeung lélépén
indung budak anu ditampa ti kuring satutasna ijab kobul di balé nyungcung. Sup deui éta dompét téh diteundeun kana tempat asalna.
Kuring
narik napas panjang. Kahayang mah beunghar jadi jelma téh. Méh teu susah nyumponan kahayang anak jeung pamajikan. Boga
duit nu matak mahi. Imah weweg. Boga motor, keun waé motor urut gé asa jagjag. Jajauheun atuh kudu ngalamunkeun boga
mobil mah asana téh lahuta teuing, teu
ngukur ka kujur, cacakan hirup sakieu gé
geus uyuhan. Hirup ti leuleutik cukleuk leungweung cukleuk lamping. Indung
budak nya kitu kénéh, nunggeulis ti keur manéhna
orok. Sasat dirorok ku bibina, uyuhan bisa sakola tepi ka tamat ésdé ogé. Kuring mah apanan teu ngalaman-ngalaman acan
anu nelah sakola téh. Keun da ayeuna
mah geus lain pakeunana mikiran sakola mah. Kiwari mah geus kudu mikiran
kulawarga. Sanajan buktina karék
semet kieu, tapi geus kudu ngarasa sukur bisa nyiruruk di imah kieu ogé. Nu penting mah bisa dipaké ngiuhan tina hujan jeung panas.
“Nyi,
wayahna maskawin téh diinjeum heula ku
Akang,” kuring ngaharéwos sabot ngagolér gigireunana. Budak mah témbong geus tibra.
“Maksad
akang kanggo ka alun-alun badé ngical
cingcin?” manéhna rada ngoréjat.
“Kumaha
deui atuh? Sugan taun hareup akang loba pagawéan
keur ngagantina” kuring rada melas-melis. Sakedapan mah manéhna ngahuleng.
“Nya
atuh ari kitu mah teu langkung, Akang,” pokna semu nalangsa. **
Dina
poé mapag bagantina taun, Wildan geus
tuturubun hayang mandi, hayang meuli tarompét ka warung Apih Udin. Atuh sanajan
anggang gé teu burung digugu. Ngan éta bacéo waé
hayang geura-geura indit ka alun-alun.
“Ngké sasarengan sareng Adit. Énjing kénéh kieu
mah teu acan ramé di alun-alunna ogé,” kuring ngabeberah.
“Mani
teu sabar nya, Wildan mah. Ké atuh tos
asar angkat mah, tos emam heula, tos ibak. Motorna ogé apanan teu acan dianteurkeun. Upami tos aya motor urang angkat
sasarengan, ngabring sareng Adit. Wildan nganggo acuk haneut, nya. Nganggo topi
sareng kacamata bilih kapireunpeunan. Ngké
calikna di payun,” indungna nataan prakprakan indit ka alun-alun, puguh
gé parigel dina cacaritana mah.
Kawas
anu kesel ngadagoan asar téh, pok deui,
pok deui natanyakeun iraha indit. Mani aya ku bosen ngajawabna ogé. Enya matak kitu téh atoh kacida meureun hayang geura-geura indit ka alun-alun. Sasatna
salila ieu ukur apal tina béja, kari-kari
kiwari rék diajak ka tempat anu jadi
impianana.
“Tah
Ema tos bedug asar, hayu atuh angkat,” Wildan kaciri teu sabarna téh.
“Urang
netepan asar heula, sakantenan ngantosan motorna nya,” indungna anu teu bosen-bosen
némbalan téh.
Mareng
jeung bedug asar, Mang Juha datang mawa motor séwaan jeung
hélmna. Datangna téh dituturkeu ku anakna anu maké
motor séjén.
Reug duanana eureun di hareupeun imah laju uluk salam. Kuring ngajawab bari
nyampeurkeun. Song atuh konci motor jeung susuratan motorna dibikeun ka kuring,
ku kuring ditampanan. Geus mikeun motor mah léos
Mang Juha balik deui diboncéng ku anakna.
Kuring asup deui ka imah nyampeurkeun budak jeung indungna anu tas ti cai rék ngalakonan solat asar. Tara-tara budak téh ménta
diimaman solat di imah, majarkeun méh bisa
sagancangna indit ka alun-alun. Padahal mah biasana milu ka masjid. Kangaranan ka nu jadi anak, sagala rupa oge
sok loba diturut. Cong solat babarengan,
manéhna gigireun pisan kuring, indungna
ditukangeun.
Satutas
solat, kuring jeung pamajikan saged darangdan, budak mah geus didangdanan ti
saprak dur asar. Maké baju pangalusna, teu
poho maké jékét, topi, kamacata. Tarompét mah teu leupas ti isuk mula geus ditiupan.
Sanggeus
saged tur taya nu tinggaleun, kuring
nyampeur ka Mang Ucén bapana Adit. Enya
geus jangjian saméméhna rék
indit bareng jeung Mang Ucén téh sangkan aya batur pakumaha. Cukup nenggang puguh
gé lembur kuring mah, kahalangan ku sawah
katut pasir pikeun ngajugjug ka lembur séjén anu boga jalan ka dayeuhkeun téh. Ninggang di usum ngiji, éta galengan téh
laleueur kacida, nu teu tapis pisan kana motor mah sok remen anu tiseureuleu.
Hadéna téh
teu hujan waktu rék indit mah. Keur mah ti
isuk panon poé hadé sorot, atuh galengan ogé tuus.
Anjog
ka lembur gedé mah réa anu rék
arindit ka alun-alun. Itu ieu nyarebutkeun rék
mapag bagantina taun di alun-alun. Bring atuh motor aya kana welasna arindit
ngajugjug ka kulonkeun mapay jalan aspal anu rubakna semet saméter satengah.
Jalan téh mani pungal-péngkol kacida,
meus-meus tinemu jeung calobak. Ah lain calobak ieu mah, leuwih pantes disebut
jalan taringgul. Tapi nya kudu kumaha deui, sasatna éta jalan téh hiji-hijina.
Beuki
soré beuki nyedek ka peuting lalampahan
beuki jauh. Lembur ka lembur diliwatan. Ti jalan désa ka jalan kacamatan, tuluy jalan kabupatén, jalan provinsi. Anjog ka jalan anu beuki ramé. Jalan anu ngahubungkeun kabupaten jeung ibu
kota propinsi. Beuki deukeut ka puseur dayeuh, beuki pagegek ku nu pada-pada rék mapag bagantina taun. Tarompét mah geus réang
patémbalan ditariupan barudak nu narangreu tukangeun stang motor.
Saumur-umur
bet asa kakara ayeuna ngalaman abring-abringan dina motor bari dipapaésan ku sora tarompét, lir anu mapag hiji kabungah nu digubragkeun ti langit. Padahal éta
kariaan téh ukur pupulasan. Sajatining bagantina taun téh ngurangan umur manusa jero sataun, kitu jeung kitu tiap waktuna
mun rék ditapakuran mah.
Lain
hayang-hayang teuing mapag bagantina taun. Lain pédah hayang lalajo kembang
api, tapi ieu mah rék nganjangkeun budak
ka alun-alun, ka masjid agung, bongan budak ngerenying. Meureun matak kitu ogé aya panggero ti Masjid Agung sangkan
dianjangan.
“Tiiidh….”
sora klakson di tukang kadéngé mani melengking.
“Tong
malaweung atuh euy, ieu téh di jalan raya,
ngagokan pisan,” ceuk hiji sora nuturkeun dengék
klaksonna.
Puguh
atuh matak reuwas. Matak sebér kana haté. Saumur nyunyuhun hulu karék harita aya nu nyarékan mani hahaok kitu, leuheung mun wawuh tur kuring boga salah,
ieu mah apanan jalma saliwat.
“Nyisi
atuh!” cenah, ceuk anu tadi hahaok téh bari nyiap. Biur motorna mangprung dina
lolongkrang anu méh-méhan euweuh sabab kandaraan mingkin pagegek.
“Astagfirulloh,
Kang, mani asa sieun ku nu kitu téh,” pamajikan milu hariweusweus.
“Enya.
Ari Mang Ucén jeung nu séjénna ka marana nya?”
“Tos
di payun, Kang. Ka sisi wé atuh urang mah, apanan akangna ogé teu acan lancar
nyadak motor di kota mah,” sambungna.
“Enya,
urang kasisi wé,”
Léok
motor dipéngkolkeun semu ngénca. Ti tukang kadéngé klakson leuwih tarik jeung leuwih
gedé. Sora klakson beuki réang pabaur jeung tarompét anu ditiup ku barudak.
Hiuk aya angin anu ngagelebug neumbrag kana motor nu keur disupiran. Jedak.
Bangkieung. Sorosod. Silalatu mancawura
tina awak motor . Kocéak budak ngajerit dituturkeun ku indungna anu ting
jumpalik dina aspal. Les kuring teu inget di bumi alam.
Selengseng
angin ngadalingding kawas hawa seger kembang malati. Nyah beunta. Wildan jeung
indungna imut nempo kuring. Maranéhna gugupay. Nya kuring nyampeurkeun. Awak
kacida hampangna.
“Apa,
tuh tingali kembang api téh tos mancawura di jomantara. Hayu urang udag,”
Wildan nunjuk langit paul nu pinuh ku rupa-rupa kembang api. Awakna kumalayang
lir anu kabawa angin. Kuring jeung indungna milu nuturkeun. Awak kuring jeung pamajikan
lir kajungjungkeun angin anu ngahiliwir nuturkeun nu jadi anak.
“Apa,
itu geuning alun-alun téh,” Wildan nunjuk ka handap.
“Enya,
kasép. Ayeuna mah tos terang alun-alun téh, nya. Teu kedah hoyong deui ka
alun-alun,” ceuk indungna bari bari neuteup ka handap.
Bandung,
Tungtung taun 2015
0 comments:
Post a Comment