Sajak Mangle, No. 2632 : 8 - 15 Juni 2017

TENGAHING JEMPLING

Keclak cimata tengahing peuting

nyaksi sagala kersaning Gusti

Bèntang nu ilaharna tingkaretip kiwari duka kamana lèosna

Angin nu teu welèh ngagalindengkeun peteng duka nyanding ka saha

Gurat-gurat mangsa lawas jadi katineung

Midangdam katingtrim batin

Gusti, keclak citangis tengahing jempling

nyaksi kana tumamprakna sagala dosa

Mangsa katiga nu digadabah usum ngijih,

ngajarumatkeun acining balilih

Teu di kota, teu di lembur

Kasedih jadi batur paungku-ungku

Nu carem, nu kasaeur lir piligenti

Renghap-ranjug manusa kawas haroshosna mangsa

Cunduk kana mumunggang mangsa lekasan

Gusti, tampi ieu jumerit diri

samèmèh matapoè meletèk tina tungtung handeuleum hieum.

Bandung, 10 November 2016

SOSOCA

-          Keur  Unaida

Sorot soca salira lir ciibun dina tungtung daun eurih, katojo matapoè

Raray lir alam pamandangan, tingarudat walungan Zanjabila,

Rèma-rèma salira kawas galindeng lagu nineung,

Sumaliksik dina ati

Dina saban kecap reujeung teuteup,

Salira jadi sosoca. Jadi geter reujeung renghap katresna.

Saban mangsa nu ditungtungan ku lelenggutan,

Salira jadi hawa nu diseuseup.

Jadi catetan-catetan mangsa nu bakal disorang.

Bandung, 10 November 2016