Pananya Cihujan.
(Iwan M. Ridwan)
Aya nu baris ditanyakeun ka
keclak cihujan panungtungan peuting ieu
Dimana lambaran-lambaran
nasib kuring maluguran sanggeusna burinyay gelap
ngaheumbat panghareupan nu karek diwangun tina kacinta?
Bandung, 2010
Panineungan nu digadabah
(Iwan M. Ridwan)
Aya haté nu mangkak
basa hawa tiris ngagadabah sawangan
Dina elak-elakan
katineung anjeun masih kénéh anteng nurihan jajantung ku rupa-rupa kaéndahan nu
kalarung. Poho ka temah wadi. Tuluy diri kumalayang luhureun tingkaretipna kota
Bandung.
Bandung, Mei 2008
Pinaringan
anjeun
(Iwan M. Ridwan)
Anjeun masih kénéh
inget kana jalan satapak nu kungsi disorang?
Jalan nu dicipta
tina sasalingkuhan urang.
Sisi-sisina ngampar
seuseungitan kembang nu mangkak handapeun srangéngé
Ngan di
tengah-tengahna aya kapeurih nu ngagolontor bareng jeung cimata
Kuring panggih
jeung anjeun handapeun béntang silantang
Tuluy urang
pada-pada salingkuh.
Nyalingkuhan
Pangéran.
Bandung, 26
Pébruari 2008
Hujan Wayah Wanci
(Iwan M. Ridwan)
Pras! Pris!
Girimis singpiripis
Maseuhan jalan
Maseuhan kandaraan
Cluk! Clak!
Hujan singparalak
Maseuhan haté
Maseuhan lamunan
Panghareupan milu palid jeung cileuncang
Bandung, 11 Agustus 2010
0 comments:
Post a Comment